ILOILO CITY – Wala nakatambong sa preliminary investigation ang driver sang Mazda MX5 sports car nga nakabunggo patay sa mag-asawa nga principal kag manunudlo sa Sen. Benigno Aquino Jr., Avenue, Mandurriao, Iloilo City.
Ang mga biktima amo sanday Joe Marie Osano, Principal sang Lapaz II Elementary School kag Alnie Dinah Osano, Master Teacher sang Ticud Elementary School, lunsay residente sang Leofel Subdivision Brgy. Ticud La Paz Iloilo City samtang ang suspek naman amo si June Paul Valencia, 32 anyos sang Villa Perla Subdivision Mandurriao Iloilo City.
Nagpaiway nga maghatag sang recorded interview si Prosecutor Ferdinand Thomas Magallanes apang iya ginpahayag nga napaslawan nga magpasa si Valencia sang counter affidavit kaangot sa gin-isyu nga subpoena sa iya sang Hulyo 2.
Ang nagtambong lamang sa preliminary investigation amo ang kampo sang mag-asawa nga Osano.
Nahibaluan nga wala man makapasa sang sabat sa show cause order sang Land Transportation Office si Valencia sang Hulyo 8.
Gina-alegar nga nakaguwa na sa pungsod si Valencia sang Hunyo 20 padulong sa San Fransisco, California matapos ini maghingyo sa LTO sang Hunyo 19 nga i-extend sa 15 ka adlaw ang deadline sang iya sabat bangud yara pa ini sa mental confusion.
