ILOILO CITY – Naghingyo sang extension sa paghatag sang sabat sa ginpapanaog nga show cause order sang Land Transportation Office (LTO) ang driver sang Mazda MX5 sportscar nga nakabunggo-patay sa mag-asawa nga principal kag manunudlo sa Sen. Benigno Aquino Jr. Avenue Mandurriao, Iloilo City.
Sa exclusive interview sang Bombo Radyo kay Ms. Riza Otayde, tagpamaba sang LTO Region 6, iya ginpahayag nga nagpasa sang sulat sa LTO si June Paul Valencia, 32 anyos sang Villa Perla Subdivision Mandurriao Iloilo City.
Kaundan sang nasambit nga sulat suno kay Otayde amo ang paghingyo ni Valencia sang 15 ka adlaw nga extension sa show cause order.
Paathag ni Valencia, may yara pa ini sang mental confusion sa diin na trauma ini sa natabo nga pagbunggo-patay sa mag-asawa nga Joe Marie Osano, 49 anyo, principal sang Lapaz II Elementary School kag Alnie Dinah Pet-Osano, 45 anyos, Master Teacher II sang Ticud Elementary School.
Matandaan nga Hunyo 18, sang ginpagwa ang show cause orders sa diin ginhatagan nila sang lima ka adlaw si Valencia agud makapaathag.
Ginadumilian man si Valencia nga magmaneho sang anuman nga salakyan bangud suspendido ang iya drivers license sa sulod sang tatlo ka bulan.
