ILOILO CITY – Wala makasabat sa show-cause order ang driver sang Mazda MX5 sports car nga nakabunggo patay samag-asawa nga principal kag manunudlo sa Sen. Benigno Aquino Jr., Avenue, Mandurriao, Iloilo City.
Ang mga biktima amo sanday Joe Marie Osano, Principal sang Lapaz II Elementary School kag Alnie Dinah Osano, Master Teacher sang Ticud Elementary School, lunsay residente sang Leofel Subdivision Brgy. Ticud La Paz Iloilo City samtang ang suspek naman amo si June Paul Valencia, 32 anyos sang Villa Perla Subdivision Mandurriao Iloilo City.
Sa interview sang Bombo Radyo kay Mr. Jojo Jamerlan, deputy chief for operations sang Land Transportation Office(LTO) 6, iya ginpahayag nga mahulat sang tatlo ka adlaw ang ahensya bangud mahimo nga ginpadala ni Valencia ang iya sabat pinaagi sa registered mail rason nga delay ang pag-abot sini sa LTO.
Suno kay Jamerlan, mahimo nga palawigon ukon i-revoke ang suspension sa driver’s license ni Valencia depende sa desisyon ni LTO 6 Director Roland Ramos kag rekomendasyon sang Operations Division.
Una na nga naghingyo si Valencia nga i-extend sa 15 ka adlaw ang deadline sang iya sabat sa show cause order bangud yara pa ini sa mental confusion sa diin nagtakop na ang ika-duha nga deadline sang LTO sang Hulyo 8.
Gina-alegar nga nakaguwa na sa pungsod si Valencia sang Hunyo 20, matapos ini maghingyo sa LTO sang Hunyo 19.
