Ginpaathag sang pamunuan sang Land Transportation Franchising and Regulatory Board (LTFRB) kun nga-a wala pa sa gihapon naka-abot ang sweldo sang pila ka mga driver nga napaidalom sa service contracting program.
Matandaan nga natapos na ang nasambit nga programa sang LTFRB sang Hunyo 30 apang nagwangal ang pila ka mga driver nga tubtob subong, wala pa sa gihapon nakabaton sang sweldo nagikan sa ahensya.
Sa interview sang Bombo Radyo kay LTFRB Region VI Director Richard Osmeña, iya ginpahayag nga nag-request na sila sa Department of Budget and Management (DBM) nga i-authorize ang pondo agud ma-release na ang sweldo sang pila ka mga driver nga nasakupan sang service contracting program.
Gin-athag man niya nga ginhatagan sang choice ang mga driver kun mag-untat anay sa pagbyahe kasunod man sang pagpaidalom sa enhanced community quarantine (ECQ) sa pila ka lugar sa rehiyon partikular sa Iloilo City kag Iloilo Province.
Ginpasalig man ni Osmeña nga sa tion nga maaprubahan na ang ila hingyo sa DBM, gilayon nila nga ipanagtag ang sweldo sang mga driver nga napaidalom sa programa sang LTFRB.
