CALINOG, ILOILO – Padayon pa nga ginapangita ang suspek sa pagluthang-patay sa isa ka lalaki sa Osmeña St., Calinog, Iloilo.
Sa interview sang Bombo Radyo kay Mayor Francisco Calvo, iya ginpahayag nga ang biktima ang ginkilala kay Mario Comprendio Fuertes, 33 anyos sang Brgy. Camalongo sa nasambit nga banwa.
Suno kay Calvo, mismo siya ang nag-upod man sa hot pursuit operation kun sa diin ginapahayag nga ang suspek ang nagsakay sa duag asul nga Bajaj nga motorsiklo padulong sa Passi City.
Ginpahayag ni Calvo nga isa ka lupok ang nabati-an kun sa diin dead on the spot ang biktima.
Antes pa man ang insidente, ginapahayag nga may natabo nga settlement sa barangay level sa tunga sang biktima kag sang iya tiayon bangud sa away-pinamilya.
Suno naman kay Police Captain Genesis Roque, hepe sang Calinog Municipal Police Station, sa tangkugo ang igo sang biktima nga isa ka driver sang motorsiklo.
Natabo ang insidente suno kay Roque sa parkingan sang motorsiklo sa banwa sang Calinog kun sa diin caliber .38 pistol ang gingamit sang suspek.
Wala makita ang guya sang suspek nga nakasuksok sang helmet sang ginhimo ang krimen.
