Patay ang driver sang motorsiklo matapos ang head on collision sa 10-wheeler truck sa Barangay Tacas, Jaro, Iloilo City.
Ang driver sang motorsiklo amu si Niel Aldrin Socorro, 19 kag residente sang Barangay Pagsanga-an, Pavia, Iloilo.
Samtang, ang driver naman sang truck amu si Denmark Ganbito, 36 kag residente sang Buenavsita, Guimaras.
Sa interview sang Bombo Radyo PCMSgt. Julius Uy, traffic investigator sang Jaro Police Station, iya ginpahayag nga base sa final position sang duha ka salakyan, makit-an nga naglapaw kag ginsakop sang motorsiklo ang lane sang truck.
Suno kay Uy, posible nga parehas nga madasig ang pagpadalagan sang truck kag motorsiklo.
Nakaagum sang patal nga pilas ang driver sang motorsiklo matapos nga nagtabug kag naipit sa idalom sang truck nga amu ang gintunaan sang iya kamatayon.
Dugang pa sang imbestigador, posible nga wala sang suksok nga helmet ang driver sang motorsiklo bangud wala sang may narekober sa lugar.
Nagsungka naman sa pulis ang driver sang truck kag subong detained sa Jaro Police Station kag nagapangatubang sang kaso nga reckless imprudence resulting to homicide kag reckless imprudence resulting in damage to property.
