LEGANES, ILOILO – Patay ang isa ka driver sang motorsiklo matapos ini nga nagsuhot sa truck sa Barangay Nabitasan, Leganes, Iloilo.
Ang biktima ang ginkilala nga si Jojo Quezon, 39 anyos, tumandok sang Bacolod City kag temporaryo nga nagatinir sa Brgy. Tubigan, Zarraga samtang ag driver naman sang truck amo si Eduardo Sanoria, 51 anyos sang Mandaue City, Cebu.
Sa interview sang Bombo Radyo kay Police Staff Sergeant Emmanuel Maude, traffic investigator sang Leganes Municipal Police Station, iya ginpahayag nga padulong kun tani si Quezon sa syudad partikular sa Quintin Salas agud nga magtrabaho apang nasugata sini ang truck kag nagsuhot ini siya sa idalom nga bahin.
Suno kay Maude, padulong man kun tani ang driver sang truck sa Dumangas, Iloilo agud nga magpauli na sa Cebu.
Sa subong, yara na sa kustodiya sang Leganes PNP si Sanoria.
