ILOILO CITY – Patay ang driver sang motorsiklo matapos nga nakabunggo ang ginasakyan sini sa nakasugata nga Ceres bus sa Barangay Tinuri-an, Barotac Nuevo, Iloilo.
Ang driver amo si Ryan Aposaga, 34, residente sang Barangay Tabucan, Barotac Nuevo, Iloilo.
Ang nagamaneho naman sang bus amo si Eduardo Simpron, Jr. residente sang Barangay Salihid sang amo nga banwa.
Patal nga pilas sa ulo ang naagum sang biktima.
Sa interview sang Bombo Radyo kay Police Major Reagan Oriñas, hepe sang Barotac Nuevo Municipal Police Station, iya ginpahayag nga padulong sa direksyon sang syudad ang driver sang motorsiklo samtang ang bus naman ang padulong sa Northern Iloilo.
Sa imbestigasyon sang kapulisan, gin-agaw sang motorsiklo ang linya sang bus nga amo ang rason sang insidente.
Wala sang suksok nga helmet ang driver sang motorsiklo kag yara sa impluwensya sang makahulubog nga ilimnon.
Sa subong, yara sa kustodiya sang Barotac Nuevo Municipal Police Station ang driver sang bus.
