Patay ang driver sang motorsiklo matapos nga nakabunggo sa isa ka salakyan sa Barangay Sigangao, Zarraga, Iloilo.
Ang biktima amo si Jovani Abogadil, 31-anyos, single, residente sang Barangay Pasil, New Lucena, Iloilo.
Sa interview sang Bombo Radyo kay PSSG. Raffy Gonzales, imbestigador sang Zarraga Municipal Police Station, iya ginpahayag nga ang biktima ang naghalin sa Bangga Bante kag padulong kontani sa banwa sang Zarraga.
Apang, nasalakay sini ang mga signages sa dalan, rason nga nakabunggu sa nakapondo nga awto.
Ginpahayag man sini nga nagpondo lamang ang awto agud kontani nga magbulig sa nauna nga na-disgrasya sa amo man nga lugar.
Natukiban man nga magluwas sa brownout kag wala sang suga ang dalan sa tion sang insidente, wala man sang suksok nga helmet ang driver sang motorsiklo rason nga nakaagum sang patal nga pilas sa ulo.
Gindala pa sa hospital ang biktima apang gindeklara man nga dead on arrival (DOA).
Yara naman sa kustodiya sang Zarraga Municipal Police Station ang driver sang awto.
