Patay ang isa ka driver sang motorsiklo samtang pilason naman ang angkas sini nga iya nobya matapos nga nakabunggo sa naga U-turn nga jeep sa Brgy. Bolong Oeste, Sta. Barbara, Iloilo.
Ang driver sang motorsiklo amo si Julius Bolivar Montales, 23-anyos, kag residente sang Brgy. Buhayon, Sta. Barbara, Iloilo, samtang ang angkas sini amo si Frell Aida Osano Depon, 22-anyos, residente sang Purok 1, Brgy. Pase, San Dionisio, Iloilo.
Ang driver naman sang jeep amo si Sulficio Sancada Vallejo, 39-anyos, kag residente sang Brgy. Tiring, Cabatuan, Iloilo.
Sa interview sang Bombo Radyo kay Police Captain Raffy Seneñes, Chief of Police sang Sta. Barbara Municipal Police Station (MPS), iya ginkumpirma nga napatay ang driver samtang ginabulong ini sa hospital.
Suno kay Seneñez, naghalin sa syudad sang Iloilo ang mga sakay sang motorsiklo kag padulong kuntani sa banwa sang Sta. Barbara, sang nakalab-ot sa lugar sang aksidente, nakabunggo ini sa naga U-turn nga jeep.
Base sa imbestigasyon, madasig ang pagpadalagan sang motor kag wala ang mga ini sang suksok nga helmet, dugang pa nga wala man sang lisensya ang driver kag indi man ini ang nagapanag-iya sang amo nga motor.
Bangud sa impact, nakaagum ang duha sang pilas sa ila ulo kag nagkalain-lain nga parte sang ila lawas.
Ginrelease naman sang kapulisan ang driver sang jeep apang pabalikon man para sa dugang nga imbestigasyon.
