ILOILO CITY – Wala na ginpreso ang driver sang pick-up nga nakabunggo sa isa ka balay sa Barangay Buhang, Jaro, Iloilo City.
Ang driver sang pick-up amo si Darwin Victor Belicena, 48, residente sang Barotac Viejo, Iloilo.
Ang tag-iya naman sang balay nga naka-angkon sang bagras amo si Arcenia Dalisay, 60, residente sang amo nga barangay.
Sa interview sang Bombo Radyo kay Police Chief Master Sergeant Marlon Legaspi, traffic investigator sa Jaro Police Station, iya ginpahayag nga wala sang seryoso nga pilas ang tag-iya sang balay kundi palanakit lamang sa abaga.
Suno kay Legaspi, indi pagkapreso ang penalidad sang violation kundi multa lamang kag balayran sa damage nga natuga sang aksidente.
Gin-athag man ni Legaspi nga apisar nagapanimaho sang makahulubog nga ilimnon ang driver, indi mapamatud-an nga naka-inom gid man ini bangud nga wala sang alcohol breath analyzer ang kapulisan.
Apang bangud nga wala sang mga dokumento nga ginpakita ang driver sang pick-up, gin-hold ang iya salakyan sa Barangay Hall sang Buhang.
Subong nga adlaw, ginalauman nga maga-istoryahanay ang magtimbang nga bahin agud nga ma-settle ang balayran.
