Driver sang Punong Barangay sa Miagao nga masami nagapangumpra sang isda sa Iloilo Fish Port Complex, positibo sa COVID-19; Wet market sa banwa, siraduhon tatlo ka adlaw para sa disinfection

Siraduhon temporaryo ang wet market sang Miagao, Iloilo matapos magpositibo sa COVID-19 ang isa ka driver sang punong barangay nga nagapangumpra sang isda kag masami nga yara man sa merkado sang banwa.

Sa interview sang Bombo Radyo kay Mayor Macario Napulan, iya ginpahayag nga isa ka punong barangay ang nagapangumpra sang isda sa Iloilo Fish Port Complex kaupod ang iya nga driver ang ginpa-idalom sa swab test para sa COVID-19 apang nag negatibo ang resulta sang punong barangay magluwas sa iya driver nga positibo.

Suno kay Napulan, masami nga nagakadto ang amo nga driver sa wet market bangud man sa pila ka mga transaksyon nga ginahimo sini rason nga ang 60 ka mga vendors ang natalana nga kuhaan sang swab sample.

Agosto 19 tubtob Agosto 21 naman ang schedule sang pagpasirado sang wet market sang banwa.

ISA KA PULIS SA MIAGAO, POSITIBO MAN SA COVID-19

Samtang subong, Agosto 18 natalana nga magpakuha sang swab sample ang 33 nga mga pulis sa Miagao Municipal Police Station matapos magpositibo sa COVID-19 ang isa ka pulis.

Pahayag sang alkalde, nagpauli sa Negros Occidental ang pulis kag nagbalik sang Agosto 7 sa Iloilo apang nagtinir pa ini isa ka gab-i sa Mandurriao, Iloilo City kag nagbalik sa Miagao Agosto 8.

Ginpahayag ni Napulan nga ginhilanat ang pulis, na-ubo ag na sip-on.

Agosto 10 sang ginkuhaan siya sang swab sample kag natukiban nga positibo ini sa COVID-19.

May yara naman sang 20 ka mga pulis nga iga-augment sa Miagao.