Ginpasakaan sang kaso nga Reckless Imprudence Resulting to Homicide ang driver sang sports utility vehicle (SUV) nga nakabunggo-patay sa isa ka food delivery rider sa General Luna-Jalandoni Flyover sa Iloilo City Proper.
Ang napatay nga driver sang motorsiklo amo si Zsisley Cesnero, 34 , tumandok sang Cabatuan, Iloilo apang nagapuyo subong sa Brgy. Boulevard, Molo, Iloilo City.
Ang driver naman sang SUV amo si Keith Estellero, 35, residente sang Tanza Timawa Zone II, Iloilo City Proper.
Nahibaluan nga maliko na kuntani ang motor sa General Luna-Jalandoni Flyover sang ginbungguan ini sang SUV.
Ginapahayag nga madasig ang dalagan sang SUV kag nakainom pa ang driver.
Sa interview sang Bombo Radyo kay Police Lt. Col. Marlon Valencia, pinuno sang Traffic Enforcement Unit sang Iloilo City Police Office (ICPO), iya ginpahayag nga naki-angot na sa ila Land Transportation Office (LTO) Region 6 may kaangtanan sa pila ka mga dokumento kag ebidensya sa natabo nga insidente.
Suno kay Valencia, nagpalagyo pa ang suspek matapos nabungguan ang food delivery rider.
Apang nadakpan ini sa Brgy North Baluarte., Molo, Iloilo City bangud may naglagas nga iban pa nga concerned food delivery riders kag mobile personnel halin sa Iloilo City Police Station 1.
Samtang, padal-an naman sang show cause order sang Land Transportation Office (LTO) Region 6 ang suspek nga nakabunggo-patay sa food delivery rider.
Sa exclusive interview sang Bombo Radyo kay Atty. Gaudioso Geduspan, Asst. Regional Director sang LTO Region 6, iya ginpahayag nga katuyuan sini nga makahatag sang paathag si Estellero kun nga-a indi pag i-revoke ang driver’s license sini may kaangtanan sa natabo nga insidente.
Suno kay Geduspan, imbestigaran man nila kun matuod nga yara sa impluwensya sang makahulubog nga ilimnon si Estellero sang nabungguan-patay ang delivery rider.
Kun mapatud-an suno kay Geduspan, pat-od nga madulaan ang suspek sang lisensya sa pagbyahe.
