Ginbawian sang kabuhi ang driver sang taxi nga nakabunggo sa bus sang Calinog Bus Line (CBL) sa Barangay Bolong Este, Sta. Barbara, Iloilo.
Ini amo si Jomar Senerado nga gindala sa ospital apang gindeklarar nga dead-on-arrival.
Ang isa pa gid nga napatay amo si Jeric Huyo, ang lalaki nga nagakabit sa depampasahero nga jeep nga may ruta nga Janiuay- Pavia Terminal and vice versa.
Nahibaluan nga madasig ang pagpadalagan sang taxi rason nga nakabunggo ini sa likod sang CBL nga naga U-turn kuntani.
Sa pihak nga karsada naman, nagapadulong man ang depampasahero nga jeep sang Janiuay nga may dala nga mga pasahero lakip na ang nagakabit sa likod sang jeep.
Sa pagbunggo sang taxi sa likod sang CBL,bangud sa impact natulod niya ini pauna kag nadalasa sang CBL ang Janiuay nga jeep kag didto na nagtabog ang nagakabit nga pasahero gintunaan man sang iya kamatayon.
