Gamiton sang Central Elections Committee sang Israel ang mga drones agud nga mag-monitor gikan sa kahawaan sa 751 ka mga special polling stations.
Ang Israeli legislative election ang pagahiwaton sa Marso 23 agud nga mag-eleher sang 120 ka mga myembro sang 24th Knesset.
Ang Knesset ang isa ka unicameral national legislature sang pungsod.
Bilang legislative branch sang Israeli government, ang Knesset amo ang nagapasar sang tanan nga layi kag naga-eleher sang presidente kag prime minister.
Suno kay Bombo International Correspondent Julie Ann Siasat direkta sa Israel, kun makit-an sang drones ang linya sang mga botante nga tuman ka laba, ang mga voters ang sayluhon sa iban nga mga special polling stations agud malikawan ang ginutok sa tunga sang COVID-19 pandemic.
Agud nga mahagan-hagan ang linya sa mga special polling stations, apat ka mga polling station ang itukod sa Ben-Gurion Airport para sa mga returning Israelis nga magaboto.
Samtang may yara man sang mga protesters pahayag ni Siasat nga nagapatigayon sang hublag protesta batuk kay Prime Minister Benjamin Netanyahu bangud sa graft kag pagdumala sini sang coronavirus pandemic.
May yara sang mga protesters sa guwa sang balay sang prime minister sa Jerusalem kag may pa gid sa guwa sang private home sini sa coastal area sang Caesaria.
Regular na nga nagahiwat sang hublag protesta ang mga demonstrador batuk kay Netanyahu sa diin ginamanduan nila ini nga magresign kasunod sang mga kaso nga bribery, fraud kag breach of trust nga ginapangatubang sang prime minister.
Nahibaluan nga pinasahi subong ang eleksyon sa Israel bangud sa labing una nga kahigayunan, ang unlimited rule ni Prime Minister Benjamin Netanyahu sa “nationalist camp” ang ginhangkangat sang pihak nga grupo, indi lamang sang isa ka kasumpong kundi duha — ini amo sanday Gideon Sa’ar sang New Hope Party kag Naftali Bennett sang Yamina.
