Indi basta-basta makapatigayon sang drug buy bust operation ang kapulisan kun wala ini maayo natun-an ukon gin-surveillance antes ang operasyon.
Ini ang may kaangtanan sa natabo nga insidente sa North Baluarte Molo, Iloilo City kun sa diin naluthangan-patay si Karl Daniel Bolante, 27, residente sang amo nga lugar.
Sa interview sang Bombo Radyo kay National Police Commission (NAPOLCOM) Region 6 Director Atty. Joseph Celis, iya ginpahayag nga indi pa matul-id kun bala sibilyan gid man ang naluthangan sang pulis ukon drug returnee.
Suno kay Celis, ginatahod niya ang Regional Internal-Affairs Service (RIAS) nga amo ang talatapan nga nagapatigayon subong sang motu proprio investigation sa natabo nga insidente apang may mga tion man nga ginakuha nila ang ini nga kaso agud nga sila mismo ang ma-imbestiga ilabi pa kun magdangop ang pamilya sa ila.
Dugang pa sang natungdan, indi lang anay mag-conclude ang NAPOLCOM Region 6 bangud nagakadapat nga hibaluon anay ang matuod nga natabo.
