ILOILO CITY – Nagapati ang kapulisan sa Western Visayas nga nagapailin pa sa rehiyon ang ginakabig no. 1 drug lord sa Region 6 nga si Richard Prevendido sang Prevendido Drug Group.
Sa interview sang Bombo Radyo Iloilo, ginpahayag ni Police Regional Office 6 (PRO-6) director Chief Supt. Jose Gentiles nga nagapati sila nga naganapanago lang sa Panay si Prevendido.
Posible suno kay Gentiles nga nagpalayo si Prevendido sa komunidad apang wala sila sang impormasyon kun sa diin ini nagapanago subong.
Suno pa sa PRO-6 director, posible nga bisan sa iya pamilya, gin-utod naman ni Prevendido ang koneksyon.
Apang nakabaton sang impormasyon ang PRO-6 nga ginbag-o ni Prevendido ang dagway sini.
Ginpahayag ni C/Supt. Gentiles nga may intelligence information sila nga pareho na ang dagway ni Prevendido sa anay lider sang Cuba nga si Fidel Castro kag nagpalaba man sang bigote.
Madumduman nga ginpangako sadto ni Gentiles nga antes matapos ang tugi 2016 madakpan na si Prevendido nga wala matabo tubtob subong.