ILOILO CITY–Patay ang isa ka anay inmate matapos nagbato sa mga kapulisan sa buybust operation sa Lacson Avenue, Barangay Tacas, Jaro, Iloilo City.
Ang biktima ang ginkilala kay Gabriel Poblacion, 34 anyos kag tumandok sang Jereos Dike, La Paz, Iloilo City apang temporaryo nga nagapuyo sa nasambit nga lugar.
Sa interview sang Bombo Radyo,  ginpahayag ni Police Senior Inspector Kennith Bermejo, team leader sang Regional Drug Enforcement Unit (RDEU) 6, nagbato si Poblacion rason nga napilitan ang RDEU nga tiruhon ang natungdan.
Ginapahayag nga ang natungdan ang katapo sang Poblacion Group nga naangot sa robbery kag hold-up.
Nakuha naman sa bulsa ni Poblacion ang isa ka granada kag ang armas nga gingamit sa pagpalupok batok sa operatiba.
Suno kay Bermejo, ginpatigayun ang buybust sa mismo balay sang subject nga nabaklan sang isa ka sachet sang ginapatihan shabu balor 2,000 pesos.
Dugang nga nakugha gikan kay Poblacion ang 20 ka iban pa nga sachet sang ginapatihan shabu kag dugang nga isa ka bulto sang ginapatihan shabu.
Gindugang pa ni Bermejo, nagapatigayun na sa gihapon sang illegal drug transaction si Poblacion sa sulod sang preauhan tubtub nga nakaguwa.
Nag-angkon naman sang igo sa dughan, ulo kag duha ka igo sa likod si Poblacion.