ILOILO CITY – I-require sang Iloilo Provincial Government sa hiring process ang drug testing kasunod sang pagkadakop sa administrative aide sang Iloilo Provincial Budget Office sa ginpatigayon nga drug buy-bust operation sang City Drug Enforcement Unit sang Iloilo City Police Office.
Sa interview sang Bombo Radyo kay Iloilo Governor Arthur Defensor, Jr., iya ginpahayag nga indi lang sa mga nagasulod nga empleyado ang ipaidalom sa drug testing kundi mangin ang mga empleyado nga madugay na nga nagatrabaho sa Iloilo Provincial Capitol.
Indi lang mapat-od sang gobernador kun mangin random drug test ang patigayunon.
Apang gin-ako ni Gov. Defensor nga nagakinahanglan ini sang dako nga pondo kag dapat nga madala sa supplemental budget.
Pahayag sang gobernador, ang pagkadakop sa empleyado sang kapitolyo ang indi lang magaserbe nga warning para sa mga government employees kundi sa tanan gid nga tawo.
Ini bangud nga wala sang may ginapili ang problema sa iligal nga droga sa kun sin-o ang tawo nga ma-involve diri — professional man ukon indi.
Nahibaluan nga nagpaguwa sang Executive Order No. 243 si Governor Defensor nga nagatukod sang fact-finding committee agud ma-imbestigaran si Jojerick Bisnar, Administrative Aide IV sang Provincial Budget Office nga nadakpan sa drug buy-bust operation.
Lakip sa myembro sang fact-finding committee amo sanday Atty. Mae Therese Albacete sang Provincial Legal Office bilang chairperson; Mariane Castillo, ang head sang Human Resource Management and Development Office; kag Joel Lego, Security Officer sang Security and Safety Services.
