Nagguwa sa imbestigasyon sang Department of Social Welfare and Development nga may discernment ukon nakahibalo sang iya ginhimo ang 15-anyos nga estudyante nga isa sa mga suspek sa pagpangluthang sa San Jose National High School sa Tacloban City.
Suno kay DSWD Secretary Rex Gatchalian, base sa assessment sang mga social worker, nahibaluan sang menor de edad kun ano ang iya himuon kag ang posible nga resulta sini.
Ipasaka sang DSWD ang ila findings sa korte nga amo ang magadesisyon kon ano ang epekto sini sa kaso.
Nagahulat man ang ahensya sang resulta sang psychological evaluation sang 15-anyos kag sang iya 14-anyos nga kaupod nga suspek agud mahibaluan ang nagakaigo nga intervention para sa ila.
Matandaan nga tatlo ka mga estudyante ang napatay kag 20 ang napilasan sa insidente sang pagpaniro sa amo nga eskwelahan sang Hunyo 22.
Suno sa pulis, ang armas nga ginamit sang 14-anyos nga suspetsado iya sang iya tiya nga isa ka aktibo nga pulis, samtang ang armas nga narekober sa 15-anyos nga suspetsado na-trace sa iya lolo nga anay security guard.
Nagapati man ang mga imbestigador nga ginplano ang krimen sa sulod sang sobra isa ka bulan base sa mga bayluhanay sang mensahe sang duha ka menor de edad.
Padayon ang imbestigasyon sang mga awtoridad sa posible nga motibo, lakip na ang mga report nga pareho sila nga naka-eksperyensya sang bullying.
Ginatan-aw man kun may epekto ang gin-report nga pagkaadik sang 14-anyos nga suspetsado sa isa ka violent mobile game nga GoreBox.
Matandaan nga sang Hunyo 23, napasaka na sang Philippine National Police ang panumbungon batok sa 15-anyos nga suspek nga multiple counts sang frustrated murder kag physical injuries.#
