Hugot nga ginpanginwala sang Department of Social Welfare and Development Region 6 ang alegasyon ni Vice President Sara Duterte nga wala ginasapak sang ahensya ang gina-endorso sang Office of the Vice President nga mga referrals for assistance.
Sa interview sang Bombo Radyo kay Atty. Mae Rago Castillo, spokesperson sang Department of Social Welfare and Development Region 6, iya ginpahayag nga wala sila sang ginapili nga mga referral, sa kondisyon nga eligible kag qualified ang mangin benepisyaryo kag may yara sang available nga pondo.
Suno kay Castillo, sa pagkamatuod, base sa referrals halin sa OVP, subong nga tuig, 34 clients ang nahatagan sang kabilugan nga P1.1 million para sa medical,burial, food kag cash assistance sa region 6.
Ginpasiguro man sini padayunon sang ahensya ang paghatag sang assistance sa sin-o man nga nagakinahanglan sang bulig.
Dugang man sini nga sa subong, madamo pa sang pending nga mga application for assistance sa ahensya.
