DSWD all-set na sa pag-abot ni Super Typhoon Mawar; relief packs ipanagtag sa mga lugar nga maapektuhan sang bagyo

ILOILO – Nagpain ang Department of Social Welfare and Development sang food packs kag non-food items samtang nagahanda sa pag-igo sang Bagyo Betty.

Sa interview sang bombo radyo kay Therese Fely Legaste, Information Officer for Disaster Response Management Division sang Department of Social Welfare and Development Region 6, iya ginpahayag nga naghanda sila sang kabug-usan nga 36, 251 ka mga food packs nga nagabalor sang P44.7 million kag non-food items nga P44.2 million.

Suno kay Legaste, ang nasambit nga mga food packs kag non-food items ang yara sa mga warehouses sa nagakalain-lain nga lugar sa Western Visayas.

Sa Iloilo, 17, 716 ang ginpain nga food packs; 14,092 naman sa Bacolod City; kag 2,700 sa Antique.

Ginpahayag ni Legaste nga ipanagtag nila ang nasambit nga mga food packs kag non-food items sa tion nga mag-igo ang bagyo sa rehiyon.