NEGROS OCCIDENTAL – Nagpalab-ot sang bulig ang Department of Social Welfare and Development sa mga pamilya nga apektado sang paglupok sang bulkan Kanlaon sa Negros province.
Sa interview sang Bombo Radyo kay Atty. Carmelo Nochete, regional director ng sang DSWDRegion 6, iya ginpahayag nga halos P49 million nga balor sang bulig ang napanagtag sang central office sa mga residente nga pinakaapektado sang paglupok sang bulkan.
Sa subong, padayon pa ang ginahimo nga repacking sang ahensya sang mga family food packs.
May yara man sang masobra P2.7 billion nga balor sang relief assistance ang ahensya kag may standby fund nga masobra P300 million.
Padayon naman ang koordinasyon sang nagkalain-lain nga ahensya sang gobyerno samtang yara sa Alert Level 2 ang bulkan.
Nahibaluan nga gilayon nga nagpadulong si Social Welfare Secretary Rex Gatchalian sa Negros agud personal nga pamunuan ang disaster response operations sang ahensya sa mga pamilya nga apektado sang paglupok sang bulkan.
Nagmando man ang tiglikom sa concerned Field Offices para sa deployment sang Mobile Command Centers agud mahanda na ini sa real-time coordination and communication para sa national and local government agencies.
