Ginalantaw sang Department of Social Welfare and Development (DSWD) ang eligibility sang malapit 1.2 million households nga ipasulod sa Pantawid Pamilyang Pilipino Program (4Ps).
Suno kay Social Welfare Assistant Secretary kag spokesperson Irene Dumlao, kabug-usan nga 1,184,768 households ang nagapaidalom subong sa validation agud matumod kun kuwalipikado sila nga magkuha sang 4Ps benefits base sa criteria sang programa.
Agud maka-qualify sa programa, kinahanglan nga handa mag-comply ang pigado nga household sa mga kondisyon. Dapat man nga may 0-18 nga edad sang miyembro sang pamilya ukon nagabusong nga miyembro sang pamilya sa tion sang rehistrasyon.
Kun ma-validate na kag mahibaluan nga eligible, ini nga households amo ang maga-ilis sa mga benepisyaryo nga ginkakas na sa programa.
Sang 2008 sang ginlunsar ini bilang national poverty reduction strategy and human capital investment program nga nagahatag sang conditional cash transfers sa pigado nga households sa maximum period nga pito ka tuig.
Ginagamit ini sang gobyerno agud nga mas mapaayo ang ikaayong lawas, nutrisyon, kag edukasyon sang mga kabataan.
