ILOILO CITY – Gin-athag ni Department of Social Welfare and Development 6 Director Ma. Evelyn Macapobre nga indi na mangin prayoridad sa pagahatagan sang Social Amelioration Program ang mga nalakip sa family roster sang Pantawid Pamilya Pilipino Program (4Ps).
Suno kay Macapobre, posible lang nga madala sa listahan sang makabaton sang cash assistance ang mga nalakip sa family roster sang 4Ps apang kinahanglan nga magpasa sang tanan nga requirements para sa cross matching nga patigayunon.
Ginpahayag ni Macapobre nga kun ano man ang mangin resulta sang cross matching sang DSWD Regional Office 6, ini ang igapasa sa DSWD Central Office, Department of Finance kag Department of Budget and Management para sa dugang nga cross matching.
Ang mga makapasar suno sa natungdan amo ang magabaton sang cash assistance nga P6,000.
Nauna na nga ginpahayag ni Macapobre nga lakip sa lima ka kondisyon agud malakip sa makabaton sang ayuda ang mga nalakip sa family roster sang 4Ps amo ang mga masunod:
(1) Nagakadapat nga indi na katapo sang 4Ps
(2) Nakaseparar na sa pamilya nga benipesyaryo sang 4Ps
(3) Indi na benipesyaryo ukon wala na nagabaton sang cash assistance sang 4Ps
(4) Duha na ka bulan nga separado sa pamilya nga katapo sang 4Ps
(5) Dapat ‘move out’ na ang status
Sa bahin sang move out status:
(1) Kinahanglan nga mapaidalom sa validation kag makapangayo sang certification sa Punong Barangay nga nakaseparar na sa pamilya nga miyembro 4Ps beneficiary
(2) Mismo ang grantee ang magahimo sang deklarasyon nga wala na naga-istar sa ila balay ang mangin benipesyaryo sang Social Amelioration Program
(3) Mismo ang Punong Barangay ang magapasa sang listahan sa Department of Social Welfare and Development.
Ang mga Local Government Unit sa Iloilo nga may 100% nga cash distribution amo ang mga masunod: Anilao, Batad, Bingawan, Concepcion, Maasin, Mina, New Lucena, San Enrique, San Miguel, San Rafael kag Sara.
Naglab-ot sa 33 ka Local Government Unit ang may yara sang ongoing payout samtang kapin naman sa P5.8 Billion ang napanghatag nga cash assistance sa bug-os nga Western Visayas.
