Naghingyo ang Department of Social Welfare and Development (DSWD) sa Commission on Elections (Comelec) nga i-exempt sa ginapatuman subong nga election spending ban ang P12 billion nga balor sang Ayuda Para sa Kapos ang Kita Program (AKAP) funds.
Ginsugid ini ni Comelec chairperson George Garcia kadungan sang Senate inquiry sa ginaduso nga enhanced guidelines sa kontrobersyal nga AKAP.
Suno kay Garcia, nabaton niya ang sulat sang DSWD sang Enero 16 nga naga-request sa iya nga ipa-iway na lamang ang P12.663 billion AKAP funds kag indi pag-ilakip sa election ban.
Ini nga pondo ang magluwas pa gid sa P882 million nga una nga nahatagan sang exemption sang poll body subong man nga bulan.
Wala pa sang sabat si Garcia sa amo nga request bangud wala pa man sang nahatag ang ahensya nga implementation guidelines kaangot sa AKAP.
Magluwas diri, wala man nakahatag ang DSWD sang guidelines para sa 27 ka iban pa nga social programs.
Una na nga ginpatuman sang Comelec ang ban sa Assistance to Individual in Crisis Situations (AICS) sa election period kag ginaplano nga ilakip man ang pagdumili sa distribution sang AKAP 10 ka adlaw antes ang eleksyon.
Una nga nga nagpabutyag sang kahangawa ang pila sa miyembro sang Kongreso lakip na si Senator Imee Marcos sa P26-billion funding sa AKAP. Apisar may mga espekulasyon, nagpaguwa man sang statement ang mga lider sa Kamara nga nagapanginwala sa claims nga ginagamit ang AKAP para nga makapangayo sang boto para sa masunod nga eleksyon.
