Nagpadala ang Department of Social Welfare and Development (DSWD) sang psychological first aid (PFA) team sa Myanmar kasunod sang 7.7 magnitude nga linog nga natabo sang Marso 28 nga nagbilin sang linibo ka mga patay.
Suno sa ahensya, may walo ka mga myembro ang team nga nag-abot sa Yangon sang Abril 11 bilang parte sang coordinated humanitarian response sang gobyerno sang Pilipinas.
Nagapanguna sa mission ang Disaster Response Management Group (DRMG) sang DSWD. Tuyo sini nga makabulig indi lamang sa mga Pinoy nga apektado sang linog kundi sa iban pa nga survivors nga nagakinahanglan sang bulig.
Sa pag-abot gid sang team, nag-upod sila sa Philippine Embassy officials sa mga pamilya kadungan sang solemn reception sang abo sang duha ka Filipino teachers nga kumpirmado na nga napatay bangud sa pag-collapse sang building nga ila ginatiniran.
Diri sa Pilipinas, nagahatag man ang ahensya sang psychosocial support kag counseling sessions sa mga pamilya sang apektado nga overseas Filipino workers (OFWs) nga kadam-an na-deploy bilang educators sa Myanmar. Naghatag man ang ahensya sang P10,000 nga cash assistance sa kada apektado nga pamilya.
Nahibaluan nga sa subong, may duha pa ka nabilin nga missing nga mga Pinoy sa Mandalay bangud sa amo man nga linog.
