Target sang Department of Social Welfare and Development (DSWD) nga malakip sa mga benepisyaryo sang Pantawid Pamilyang Pilipino Program (4Ps) ang mga janitor, security guards, house helpers, kag iban pa nga low-wage workers.
Suno sa spokesperson sang DSWD nga si Asec. Irene Dumlao, kabahin ini sang pagpabaskog sang programa kag sabat man sa mga komento nga ginaalegar “unfair” ang coverage sang 4Ps.
Ginhatagan niya pagtamod nga bukas ang DSWD sa mga pagbag-o sa 4Ps kag padayon sila nga naga-engage sa dayalogo upod sa Senado, Kamara, kag iban pa nga ahensya sang gobyerno para sa mga reporma sa programa.
Gindugang pa ni Dumlao nga halos 17 ka tuig na nga naga-operate ang 4Ps, gani tion na nga ipatuman ang pila ka mga pagbag-o.
