Handa na ang Department of Social Welfare and Development (DSWD) Region 6 sa pagpanghatag sang cash assistance sa mga kwalipikado nga tricycle drivers sa Western Visayas bilang kabahin sang pilot implementation sang Cash Relief Assistance nga pagaumpisahan buwas nga adlaw, Abril 8.
Sa interview sang Bombo Radyo kay Therese Fely Legaste, Regional Information Officer sang DSWD-6, ginpahayag sini nga ang target nga makabenepisyo sa initial rollout amo ang mga tricycle drivers sa highly urbanized kag component cities.
Ginalakipan ini sang Iloilo City, Roxas City, kag Passi City, kun sa diin ang kada kwalipikado nga tricycle driver makabaton sang ₱5,000 nga cash assistance.
Sa kabug-usan, ginalauman nga makabaton ang 8,450 ka mga benepisyaryo.
Yari ang numero sang mga makabaton sa tagsa ka mga syudad.
Sa Iloilo City – 1,983 ka benepisyaryo ang makabaton kun sa diin pagatung-on sa tatlo ka payout sites
Sa Passi City – 2,600 ka benepisyaryo ang makabaton nga may isa lamang ka payout sites.
Samtang, sa Roxas City naman 3,867 ka benepisyaryo nga may isa man ka payout sites.
Ginpahayag sang DSWD-6 nga makabaton man ang iban nga mga public utility vehicles (PUV) drivers, apang sa subong sa ila nga pilot implementation ginaprioritize anay ang mga tricycle drivers.
Ginapahanumdom sang ahensya sa mga drivers nga dal-on gid ang ila original driver’s license kag photocopy sini nga may ara sang pirma bilang kabahin sang requirements sa pagbaton sang ayuda.
