Nagpaathag-dugang ang regional office sang Department of Social Welfare and Development (DSWD) agud nga suportahan ang panindugan sang national office nga wala sang missing nga pondo sa ayuda sa idalom sang Social Amelioration Program (SAP) — baliskad sa mga alegasyon ni Senator Manny Pacquiao.
Kun balik-balikan ang nangin expose ni Pacquaio sang Sabado sang hapon, Hulyo 3, ginpahayag nga nadula ang P10.4 billion nga nakapain kuntani para sa pandemic aid ukon mas kilala nga ayuda.
Suno sa senador, nagsulod ang DSWD sa agreement sa e-wallet app nga Starpay agud mapanagtag ang pondo apang may yara sang 1.3 million ka benepisyaryo nga wala nakabaton sang ikaduha nga hugnat sang ayuda.
Ginpatpat ni Pacquiao nga sa 1.8 million ka benepisyaryo, 500,000 lang ang nakadownload sang application sang Starpay kag nakakuha sang kwarta.
Sa interview sang Bombo Radyo kay Mae Castillo, spokesperson sang DSWD Region VI, iya ginpahayag nga ang nakabaton lang sang ikaduha nga hugnat sang SAP distribution sa Western Visayas amo ang Bacolod City kag Iloilo Province.
Ang una nga hugnat suno kay Castillo ang ginpanagtag direkta sang DSWD kaupod ang local government units (LGUs).
Ginpahayag ni Castillo nga Abril pa lang sang sang 2020, gin-untat na ang kontrata sang DSWD sa Financial Service Providers (FSPs) kaangay sang Starpay.
Sang natapos na ang kontrata suno kay Castillo, direkta nga nag-pay-out ang DSWD sa tanan nga wala nakakuha sang ayuda sa sini nga FSPs.
Ginpaathag pa ni Castillo nga antes pa man natapos ang kontrata, ‘ALL ACCOUTED FOR’ ang tanan nga pondo nga nag-agi sa FSPs bangud regular ini nga gina-liquidate.
Wala sang nangin seryoso nga problema ang DSWD sa deal sa sini nga service providers.
Ginsulit man sang regional office ang pahayag sang DSWD central office nga handa sila mag-atubang sa imbestigasyon.
