ILOILO CITY – Nagpasalig ang bag-o nga tiglikom sang Department of Social Welfare and Development (DSWD) nga palawigon ang kontrata sang social workers nga gin-hire sa idalom sang Contract of Service.
Sa ginpatigayon nga speech ni Social Welfare Secretary Erwin Tulfo sa DSWD turnover ceremony, ginpasalamatan niya si President Ferdinand “Bongbong” Marcos Jr. nga ginpasugtan siya nga magserbe.
Suno pa sa iya, ginabaton niya ang pagpanghangkat kag nahibaluan niya ang amo nga trabaho.
Bilang una nga trabaho bilang Social Welfare Secretary, ginpromisa niya nga palawigo ang kontrata sang Contract of Service workers nga gin-hire para sa implementasyon sang serbisyo kag special projects sang departamento.
Ginpromisa man ni Tulfo nga panamion pa ang mga serbisyo agud nga mabuligan nga mapadasig ang paghatag sang kinahanglanon nga assistance para sa mga pigado, vulnerable, marginalized, kag disadvantaged sectors sang sosyodad.
Nagpasalig man si Tulfo nga tun-an ang posibilidad nga buhinan ang documentary requirements sang mga nagapangayo sang bulig.
Ginpasalamatan man ni Tulfo si anay Social Welfare Secretary Rolando Bautista bangud sang iya pagpamuno sa pihak sang COVID-19 pandemic kag iban pa nga natural calamities.
