ILOILO CITY – Naka-standby na ang food kag non-food items ang Department of Social Welfare and Development Field Office 6 sa tion nga maglaslas ang Severe Tropical Storm Chedeng sa Western Visayas.
Sa interview sang Bombo Radyo kay Therese Fely Legaste, Information Officer II sang Disaster Response Management Division sang Department of Social Welfare and Development Region 6, iya ginpahayag nga may kabugusan nga 65,423 nga mga family food packs nga nagabalor sang P41.7-Million ang natipon sang opisina.
Sa numero nga ini, 48,972 ang prepositioned goods nga yara subong sa 56 ka mga strategic locations sa Western Visayas.
Suno kay Legaste, preparado ang opisina sa kalamidad ilabi na sa posible nga halit nga matuga sang Bagyo Chedeng.
Sa subong, may yara sang masobra P5 million nga Quick Response Fund ang opisina.
