ILOILO CITY – Naglab-ot na sa masobra P1 million ang balor sang assistance nga nahatag sang Department of Social Welfare and Development Field Office VI sa mga apektado sang Southwest Monsoon nga ginpabaskog pa sang Typhoon Goring.
Sa interview sang Bombo Radyo kay Atty. Carmelo Nochete, director sang Department of Social Welfare and Development Field Office VI, iya ginpahayag nga nagapadayon ang pag-responde sang ahensya sa mga kinahangalanon sang mga apektado nga pamilya.
Suno sa iya, antes pa man ang onset sang Habagat, may naka-preposition na nga mga goods sa mga strategic locations agud nga mangin madali ang pag-abot sa mga apektado.
Ginpasiguro naman ni Nochete nga ang ahensya ang may bastante nga suplay sang bulig agud nga maka-respond sa mga localities.
May nabilin pa nga 13,522 family food packs nga nagabalor sang P6.9-million kag P40.9-million nga balor sang non-food items sa mga regional warehouses kag mga strategic sites.
Magluwas pa sini, may P5.9-million standby fund pa ang ahensya agud nga may gamiton sa tion nga kinahanglan ini.
Nagapadayon man ang koordinasyon sang Department of Social Welfare and Development sa mga local government units agud nga masiguro nga ang mga apektado nga pamilya ang mahatagan sang pagkaon kag iban pa nga mga intervention sa ila nga kinahanglan.
Ginalauman naman ang pag-abot sang dugang nga bulig nagikan sa National Resource Operations Center kag sa Visayas Disaster Resource Center sa Cebu City agud masiguro nga may bastante nga suplay para sa Western Visayas.
