Magabyahe na padulong sa USA si Department of Trade and Industry (DTI) Secretary Cristina Roque subong nga semana kaangot sa plano nga mag-istorya sa Trump administration nahanungod sa polisa sa taripa.
Abril 29 magahalin ang trade official kaupod si Special Assistant to the President for Investment and Economic Affairs (SAPIEA) Secretary Frederick Go.
Matabo naman ang meeting antes ang ila pagpauli sa Mayo 2.
Lakip sa sapulun sang duha amo ang trade gurus sang Trump administration nga sanday US Trade Representative (USTR) Ambassador Jamieson Greer kag Commerce Secretary Howard Lutnick.
Matandaan nga sang Abril 2 sang gin-anunsyo ni US President Donald Trump ang baseline nga 10-percent tariff sa tanan nga mga produkto nga halin sa iban nga mga pungsod, kun sa diin may dugang nga reciprocal tariffs sa mga pungsod nga may trade deficit sa America.
17-percent tariff ang iya sang Pilipinas nga mas manubo sa mga kaiping sini sa Southeast Asia nga amo ang Vietnam (46 percent), Thailand (36 percent), Indonesia (32 percent), kag Malaysia (24 percent).
