Ginklaro ni Trade Secretary Cristina Roque ang iya nauna nga pahayag nga makaigu na ang P500 nga budget para sa Noche Buena.
Suno sa tiglikom, ang iya buot silingon nga budget ang para lamang sa simple nga handa sa Paskuwa sa gamay nga pamilya nga may apat ka miyembro ukon mas manubo pa.
Pahayag pa sini, ginbase lamang niya ang iya pahayag sa Department of Trade and Industry (DTI) Noche Buena price guide.
“Kasya ang P500 but it depends on the number of family members. Usually ang family members na kasya itong P500 is mom, dad, and two children,” pahayag sini sa atubang sang reporters.
Sandig sa price guide, ang pinakabarato suno sa iya amo ang 500g ham nga mabakal sa P170, 250g spaghetti noodles nga P30, kag spaghetti sauce nga P48.50.
Pahayag niya, mahimo pa makadugang sang macaroni salad nga mayonnaise kag cheese. Suno pa sa tiglikom, ang ham, salad kag pandesal ang mahimo naman makabig nga halos kumpleto na nga basic Noche Buena meal.
“We can add luncheon meat, corned beef,” paathag pa sini.
Gindugang man ni Roque nga mahimo man makahatagay sang pagkaon ang mga maghimata kag magkasilingan nga amo man ang mahimo makahatag sang lain nga pagkaon sa lamesa.
Nahibaluan nga naka-post naman ang Noche Buena price guide sa DTI website kag sa ila nga social media pages. Nalakip sa listahan ang presyo para sa ham, pasta, sandwich spread, keso de bola, cheese, fruit cocktail, kaong, kag iban pa.
Yari ang iban nga presyo:
ham, P170 to P945;
fruit cocktail, P61.76 to P94.41;
all-purpose cream, P36.00 to P72;
“nata de coco,” P52.50 to P62.50;
“kaong,” P76.50 to P84;
“queso de bola,” P210 to P470;
cheese, P16.50 to P310; and
mayonnaise, P20.40 to P245.85.
Kasunod sang pahayag sang DTI, nagpaguwa naman sang mga statement ang pila ka mga mamalidha kaangay kanday Bicol Saro party-list Rep. Terry Ridon, Akbayan party-list Rep. Percival Cendaña, kag ACT Teachers party-list Rep. Antonio Tinio nga nagakwestyon sa ahensya sa basehan sang presyo sang mga item nga kinahanglan para sa Noche Buena.
“That would suffice if you travel back in time. While people are drowning in high prices, such gimmicks are very insulting. It would be better if the government would certify as urgent the proposals for a P200 salary increase so that the workers would have something for their celebrations this Christmas,” suno kay Cendaña.
Nainsulto naman si Tinio sa statement sang DTI. “How dare the DTI insult Filipino families with this outrageous claim that P500 is enough for Noche Buena? What kind of a Christmas is that—a few noodles, egg, and water? This is a slap in the face to every working Filipino struggling to make ends meet,” kabahin sang sabat sang kongresista.#
(Trade Secretary Cristina Roque/Dexter Barro II)
