Ginpasiguro sang Deparment of Trade and Industry nga wala sang dapat kabalak-an ang publiko kaangot sa posible nga paghulag sa presyo sang mga balaklon.
Sa tunga ini sang ginalauman nga pagtaas sang presyo sang gatong sa masunod nga semana bangud sa panibag-o nga tension sa tunga sang US kag Iran.
Suno kay DTI Secretary Cristina Roque, wala sang pagtaas sa presyo sang basic commodities kag prime commodities sa subong.
Pahayag pa sini nga wala sang petisyon halin sa manufacturers para sa price adjustments.
Dugang pa ni Roque, mabudlay mag-speculate sa subong gani maayo nga hulaton na lamang ang mangin development nahanungod diri.
Matandaan nga sang nag-umpisa ang inaway sa tunga sang Iran kag Amerika, nagresulta ini sa pagsaka sang mga presyo sang gatong kasunod sang mga pag-atake kag pagsarado sa Strait of Hormuz nga alagyan sang gina-transport nga gatong.
Nahibaluan nga ginakahangaw-an naman sa subong ang pagsipa sang presyo sang gatong bangud sa panibago nga tensiyon sa Middle East.
