Ginpaguwa na sang Department of Trade and Industry (DTI) ang price guide para sa school supplies para sa panibag-o nga school year nga opisyal nga magasugod sa Hunyo.
Suno sa ahensya, ginpanubuan ang presyo sang 29 ka items halin sa P1 tubtub sa P10 para nga may opsyon ang mga ginikanan kag estudyante nga mapili ang ila masarangan nga suplay.
Covered sa price guide ang 195 stock keeping units (SKU) sa 12 product categories.
Ang presyo sang apat ka SKUs sang notebook ang ginpanubuan sang P5-P10; P1-P6 naman para sa 24 SKUs sang pad paper; kag nagnubo sang singko pesos ang kada lapis. Buot silingon sini, ang presyo sang notebooks nagatupa sa P15.00 tubtub sa P52.00; ang pad paper yara sa P15.00 tubtub sa P48.75; samtang ang lapis naman yara sa P11.00 tubtub sa P24.00.
Wala naman sang pagbag-o sa presyo sang SKUs para sa ballpens, erasers, kag sharpeners.
Nagapahanumdom ang DTI sa publiko nga maghalong sa pagbakal sang school supplies, i-check gid anay ang label sang produkto kag i-check man ang numero sang leaves sang notebooks kag pad papers.
