Indi na pag-aprubahan sang Department of Trade and Industry (DTI) ang iban pa nga petisyon para sa pagsaka sa presyo sa basic goods subong nga tuig.
Ini ang kasunod sa ila nga ginpaguwa nga price guide sang nagligad nga adlaw nga partikular nga naka-sentro sa Noche Buena items.
Kun matandaan sang nagligad nga binulan, ginsiling sang ahensya gina-review nila ang mga petisyon nga pasakaan ang presyo sang mga 60 ka items kaangay sang tinapay, sardinas, habon, gatas, canned meat, noodles, pandesal kag iban pa. Ginrason sang manufacturers ang pagsaka sa presyo sang ila raw materials ukon ingredients amo man ang paghina sang peso batok sa dolyar.
Dugang sang ahensya, yara na sila sa pinal nga bahin sang konsultasyon sa stakeholders kaangot sa plano nga indi na mag-isyu sang suggested retail price ukon SRP scheme nga dinekada na nga nakaandan sang mga customer.
Sa idalom sang sini nga scheme, may yara sang 217 ka shelf-keeping units ukon SRPs nga amo ang gina-set sang manufacturers kag gina-aprubahan naman sang gobyerno.
Suno kay former DTI Usec. Ruth Castelo, ini ang nagaserbe nga proteksyon sang masa bangud nga ginalikawan sini nga pasakaan sang manufactures ang presyo.
Apang pabor man ang DTI nga ibasura na ini nga SRP scheme kag islan ini sang price range guide para sa consumers.
May mga sardine makers kag bread producers man nga pabor sa plano nga kakason ang SRP kag idepende na lamang ini sa market forces kag sa kumpetisyon nga yara sa merkado.#
