Tatlo ka bulan na nga wala gid ukon gamay lamang nga pag-ulan ang na-eksperyensyahan sa banwa sang Duenas, Iloilo.
Ini ang nangin rason kun ngaa ginpaidalom ang nasambit nga banwa sa State of Calamity.
Sa interview sang Bombo Radyo kay Geron Magbanua, Acting Iloilo Provincial Agriculturist, iya ginpahayag nga yara sa 190 ka ektarya sang talamnan sa Duenas ang apektado sang dry spell kag padayun pa ini nga nagalapad.
Suno sa iya, yara man sa pito ka mga banwa sa Iloilo ang nagpalab-ot sang ila concern subong nga ginaekspektar man nga maeksperyensyahan ang El Nino subong nga tuig tubtob sa una nga bahin sang 2027.
Dugang pa ni Magbanua, handa man ang Iloilo Provincial Government nga maghatag sang nagakaigo nga bulig sa mga maapektuhan nga mga mangunguma.
