ILOILO CITY – Gin-aresto sang British police ang anum ka mga indibidwal sa nagapadayon nga climate change protest sa isa ka oil tanker sa United Kingdom sang Sabado.
Suno kay Bombo International Correspondent Ramil Isogon direkta sa United Kingdom, ang mga aktibista ang nagasaka sa oil tanker sa central London bangud nagaprotesta sa tinutuyo nga pag-invest sang pungsod sa fossil fuel.
Ang pag-invest sa fossil fuel ang lihok sang pungsod agud amat-amat na nga pag-import sang pungsod sang langis nagikan sa pungsod Russia bilang sanction sa nagapadayon nga kinagamo sa Ukraine.
Kabahin sang Extinction Rebellion climate activism group amo ang duha ka Olympic gold medalist nga sanday Etienne Stott kag Laura Baldwin.
Ang oil tanker protest ang kabahin sang mass climate demonstrations sang Byernes sang ginatos ka mga aktibista nga naglambat sang apat ka mga dalagko nga taytay sa British capital nga nagtuga naman sang delay kag hu-ol sa central London.
Ginalauman sang Extinction Rebellion nga linibo pa ka tawo ang maupod sa protesta sa Hyde Park sa London.
Sang nagligad nga duha ka semana, nagdangat na sa masobra 600 ka tawo ang gin-aresto bangud ang mga environmental activists ang nagsaka sa oil tankers kag ginsiraduhan ang mga kaugalingon sa mga istruktura nga nag-block sang dalanon kag oil depots sa bilog nga UK.
Ang grupo nga Just Stop Oil nga konektado man sa Extinction Rebellion ang nagapanawagan nga untaton na sang gobyerno ang bag-o nga mga oil and gas projects.
Ang hublag protesta ang kabahin sang malapnagon nga climate action movement kag makita man ang grupo nga Insulate Britain nga nag-obstruct sa mga highways kag dalanon.
Suno naman sa spokesperson sang isa ka oil company, ginarespeto nila ang kinamatarong sang mga tawo nga ipabutyag ang ila sintemyento apang dapat nga panumdumon man ang ila seguradidad kag sang iban pa.
Samtang, suno naman sa pulis sa central England, siyam ka mga indibidwal ang ginkasuhan pagkatapos sang ginpatigayon nga demonstration sang Just Stop Oil sang Byernes sa isa ka oil terminal sa Kingsbury malapit sa syudad sang Birmingham.
