Nakarekord na ang Hong Kong sang pinakataas nga daily COVID-19 infection.
Ini matapos nagdangat na sa masobra 6,000 ang narekord nga COVID-19 cases sa sulod lang sa isa ka adlaw nga nagresulta sa pag-alalawas sang mga pasyente sa kada ospital.
Napilitan man ang pila ka mga COVID-19 patients nga mag-antos sang malamig nga temperatura sa saggwa sang mga ospital samtang nagahulat nga ma-admit.
Suno kay Bombo International Correspondent Joy Alcubilla, direkta sa Hong Kong, gin-anunsyo na sang gobyerno ang plano nga pagpatukod sang pila ka isolation units nga may 10,000 ka hospital beds.
Ipatukod ang bag-o nga isolation kag treatment units sa Kai Tak districts.
16 ka mga buildings ang ginhimo naman nga isolation hospitals.
Gingamit man sang gobyerno ang pila ka mga hotel rooms, sports facilities kag bag-o ginpatindog nga public housing units agud butangan sang mga pasyente.
Sa subong, padayon nga gina-istriktuhan ang travel kag business controls sa Hong Kong agud ma-contain ang pagtimbuok sang virus.
