Lauman nga mas madamo ang makabakal sang bugas sa presyo nga P29 kada kilo bangud ibaligya ini sa dugang nga Kadiwa stores sa Byernes kadungan sang official rollout sang “Bigas 29” program sang Department of Agriculture (DA).
Suno kay Assistant Secretary kag spokesman Arnel de Mesa, iga-anunsyo sa Huwebes ang dugang nga improvement kag kun may mga pagbag-o sa sini nga programa.
Una na nga gin-anunsyo ni Agriculture Secretary Francisco Tiu Laurel Jr. nga aprubado na sang National Food Authority (NFA) Council nga ibaligya ang daan apang maayo pa man nga stocks sang bugas sa NFA sa presyo nga P29 per kilo paagi sa Kadiwa stores.
Apang ginklaro ni De Mesa nga ang P29-per-kilo rice nga ibaligya sa Kadiwa stores ang indi lamang magahalin sa NFA inventory.
Para ini nga programa sa vulnerable sectors nga nagalakip sang persons with disabilities, solo parents, senior citizens kag indigenous peoples.
Una naman nga ginpahayag sang opisyal nga magauna ang implementasyon sini sa Metro Manila kag sa kaiping nga mga probinsya, apang makalab-ot man ini pati sa iban nga areas sa pungsod.
Ang implementasyon sang “Bigas 29” ang ginalantaw nga nagakinahanglan sang P1.39 billion kag P1.53 billion per month halin sa gobyerno base sa pagbanta sang agriculture chief.
Agud ma-secure ang rice supply para sa sini nga inisyatibo, plano sang DA nga mag-import sang 363,697 metric tons para maka-augment sa national buffer stocks, samtang ang NFA naman ang maga-procure sang 559,535 metric tons sang palay halin sa local farmers.
