ILOILO CITY – Nagakinahanglan ang mga health frontliners sa Iloilo sang dugang nga Personal Protective Equipment (PPE) agud maprotektahan ang ila kaugalingon batok sa coronavirus disease 2019 (COVID-19).
May kaangtanan diri, nagapanawagan ang mga pamilya sang amo nga mga medical personnel sang bulig nagikan sa iban nga pumuluyo.
Sa interview sang Bombo Radyo kay Remel Umahag, asawa sang isa ka doktor nga naga-trabaho sa Western Visayas Medical Center (WVMC) Internal Medicine Department, iya ginpahayag nga tuman ang ila kahangawa nga kaangay sa natabo sa iban nga mga pungsod, sa labing-madali nga panahon, maubos man ang amo nga mga equipment sa ospital kag mangin daku ang risgo nga ma-infect man ang mga doktor, nurses, kag iban nga hospital staff sa nasambit nga balatian.
AngWVMC sa Mandurriao, Iloilo City amo ang gindesignar nga COVID-19 Hospital sa Rehiyon 6.
Kaangot diri, mas madamo na nga pasyente ang ginalauman nga magadugok kag magpakonsulta.
Suno kay Umahag, naintindihan niya ang obligasyon sang iya bana bilang doktor, apang talalupangdon nga nagaka-apektuhan sini pati ang pagginawi sa ila balay.
Pahayag ni Umalag, bisan ang paghakos kag ang paghalok sa ila duha ka anak ang indi na mahimo sa subong bangud ginatuman ang physical kag social distancing.
Nagakahangawa man ang natungdan nga sa tion nga ma-infect ang mga medical personnel, maapektuhan indi lamang ang mga pamilya kundi pati ang ila mga kasilingan.
Sa mga interesado magdonar sang dugang nga PPEs kaangay sang n95 masks, surgical masks, overall, gowns, goggles, caps, surgical gloves kag shoe covers, suno kay Umalag, mahimo nila ini nga ibilin sa security guard sa WVMC.
Sa mga yara naman sa gwa sang Iloilo kag sa luwas sang pungsod, mahimo man nga makapadala sang cash donations.
Ini nga panawagan ang personal nga inisyatibo ni Umahag.
