Ginsabat ni Iloilo City Lone District Representative Julienne Jamjam Baronda ang pahayag ni Mayor Raisa Treñas nga posible ang isa sa mga rason sa pagbaha sa pila ka mga areas sa Jaro, amo ang proyekto sang kongresista.
Una diri, ginpahayag sang alkalde nga naglab-ot na sa tatlo ka tapak ang tubig sa mga lugar nga sadto, wala gid nagabaha kag isa sa ginatudlo sang mga residente nga balasulon amo ang mga proyekto nga ginapatuman ni Cong. JamJam Baronda.
Sa interview sang Bombo Radyo kay Baronda, iya gin-athag nga madugay na nga may pagbaha sa amo nga mga lugar, indi lamang subong ini nagsugod kag indi man dapat iangot sa iya mga proyekto.
Suno pa kay Baronda, may pamatuod nga bisan sang wala pa siya sa pwesto, may kasaysayan na ang problema sa drainage system sa Lawaan kag kasilingan sini.
Ginpahayag man ni Baronda nga ang proyekto nga ginatudlo nga kabangdanan, kabahin sang iya pagpanikasog nga mangin sabat sa madugay na nga problema sang pumuluyo, apang subong, imbes pasalamatan, ginabasol pa.
Ginpangabay niya ang ‘pasensya’ sang publiko kag ginpasalig nga may klaro siya nga plano kag determinasyon nga tapuson ang problema nga wala natagaan solusyon sang pila na ka dekada.
Suno kay Baronda, may commitment siya nga matapos ang trabaho kag mahatagan sang permanente nga sabat ang mga apektado nga lugar.
