ILOILO – Handa na ang local government unit sang Passi City sa patigayunon nga Dugong Bombo 2020 sa Hulyo 22 kag 29 sa amo nga syudad.
Ang Dugong Bombo 2020 ang himuon kaupod sa Philippine Red Cross kag “Dugo Ko, Ibulig Ko, Passinhon Ako” program sang Passi City.
Sa interview sang Bombo Radyo kay Krishna Rodriguez, blood coordinator sa amo nga syudad, iya ginpahayag nga 9 na ka tuig nga nagapatigayon sang bloodletting activity sa idalom sang amo nga programa kag ini ang aktibo nga ginapakigbahinan sang mga Passinhon.
Subong nga tuig suno kay Rodriguez, ugyunan sang mga empleyado kag job hires sang local government unit ang amo nga aktibidad apang welcome gid ang mga walk-in donors.
Nalipay man ang donor recruitment officer nga si Efren Palomo bangud apisar sang coronavirus disease 2019 (COVID-19) pandemic, ginaduso sa gihapon ang Dugong Bombo nga amo ang nagapakita sang pagkabaganihan sang mga Ilonggo.
Suno kay Palomo, importante nga madala ang amo nga programa sa nanuhay-tuhay nga banwa sa probinsya sang Iloilo agud mapasanyog pa ang pagbinuligay kag masabat ang kinanglanon sa dugo.
Sa syudad sang Passi, ang Dugong Bombo 2020 ang patigayunon sa Don Valerio Palmares Sr. Memorial District Hospital.
