ILOILO – Nangin madinalag-on ang ginpatigayon nga Dugong Bombo 2020, ang bloodletting activity sa banwa sang Oton, Iloilo.
Sa interview sang Bombo Radyo kay Jafet Salinas, COVID-19 focal person sang Oton, Iloilo, iya ginpahayag nga nagapasalamat ini sa mga volunteers nga nagdonar sang dugo sa diin nabatian sang pumulyo ang nasambit nga aktibidad sa Bombo Radyo Iloilo.
Pahayag ni Salinas nga ang pagdonar sang dugo ang pinakamaayo nga Paskwa nga mahatag sang sa isa ka tawo sa isig-kapareho niya ilabi na nga madamo ang nagakinahanglan sang dugo sa subong nga panahon.
Gin-athag man sang natungdan nga hugot nila nga ginapatuman ang tanan nga health protocol agud mangin matalunsay ang nasambit nga bloodletting activity.
Ang nasambit nga blood letting ang bunga sang pagbuligay sang Bombo Radyo Iloilo kaupod ang local government unit sang Oton, Iloilo kag Philippine Red Cross.
