ILOILO CITY – Patay ang duha ka mga tawo kasunod sang pagtay-og sang magnitude 6.8 nga linog sa Mexico, ang ikaduha nga linog sa amo nga pungsod subong nga semana.
Ang nasambit nga linog ang nagresulta sa pagkaguba sang madamo nga building kag landslides.
Ini ang nagtay-og ala 1:19 sang kaagahon malapit sa epicenter sang magnitude 7.6 nga linog sang nagligad nga tatlo ka adlaw sa western state sang Michoacán nga nagresulta sa duha ka patay.
Suno sa United States Geological Survey, ang linog ang nagsentro sa 50 km nabagatnan-panabagatnan-nakatungdan sang Aguililla, Michoacán nga may kadalumon nga 24.1km.
Suno sa gobyerno sang Michoacán, nabatyagan sang bilog nga lugar ang amo nga linog.
Madamo sang mga buildings ang nagkalaguba sa Uruapan kag pila ka landslide ang nagluntad sa mga highways.
Suno naman sa alkalde sang Mexico City, duha ka mga tawo ang napatay– isa ka babayi nga nadagdag sa hagdan sang ila balay kag isa ka lalaki nga gin-atake sa tagipusuon.
