Nagsugod na subong nga Lunes, Hunyo 3, ang duha ka adlaw nga transport strike sa syudad sang Iloilo bilang protesta sa ginapahayag palpak nga pag-implementar sang Enhanced Local Public Transport Route Plan.
Sa interview sang Bombo Radyo kay Mr. Elmer Forro, lead convenor sang No to PUV Phase-out Coalition Western Visayas, iya ginpahayag nga ini nga transport strike ang pasakupan sang drivers kag operators sang first-town jeepneys lakip ang mga nagabyahe sa ruta halin kag pakadto sa Leganes, Pavia, kag Oton.
Suno kay Forro, ginawasak sini nga route plan ang palangabuhian sang mga drivers kag ginahalitan man ang mga pasahero.
Sa sini nga route plan, gina-restrict ang pagsulod sang first-town jeepneys sa syudad sa 40% lamang sang ila usual routes sa peak hours (6 a.m. to 9 a.m. kag 4:30 p.m. to 6:30 p.m.) Sa pihak nga bahin, 25 percent naman ang ginatugutan sa off-peak hours rason nga ginalantaw nga daku gid ang impact sa adlaw-adlaw nga kita sang mga driver.
Pahayag pa ni Forro, ini nga transport strike amo ang ila nga demonstrasyon nga wala nila nagustuhan ang ginapatuman nga route plan sa syudad.
Matandaan nga sang Byernes, nagpatigayon ang apektado nga drivers kag operators sang press conference agud magpanawagan sa city government nga magbalik sa previous system agud matugutan ang 100 percent nga pagsulod sa Iloilo City.
