𝗖𝗘𝗕𝗨 𝗖𝗜𝗧𝗬 — Nagtulo ang luha kag daw indi makapati ang duha ka mga atleta nga pambato sang Western Visayas sa Palarong Pambasa 2024 matapos nga nakuha nila ang gold kag silver medal sa 200-meter run (elementary-girls).
Ang nakakuha sang Gold amo si Princess Mae Lachica, incoming Grade 7 student; samtang ang nakakuha naman sang Silver amo si Ayena Dhawn Cabalfin, kag lunsay tumandok sang Carles, Iloilo.
Sa interview sang Bombo Radyo kay Lachica, nga amo ang nakakuha sang gold, iya ginpahayag nga dako ang iya pagpasalamat sa iya nga iloy kag amay nga bug-os nga nagpakita sang suporta sa iya sugod sang siya naga-umpisa pa lamang.
Suno kay Lachica, nangin dako man ang kontribusyon sang iya trainers kag coaches agud nga makuha sini ang ginahandom nga bulawan.
Ginpahayag man sini nga magapadayon ini sa pag-intra sa amo nga hinampang agud madepensahan ang amo nga titulo.
Naghilibi-on naman si Cabalfin sa iya nabatyagan nga kalipay matapos makuha ang silver nga medalya.
Nagpasalamat man ini sa Dios, sa iya pamilya, maestro, kag maestra bangud sa pagpakita sang hugot nga suporta sa iya tubtob nakuha sini ang medalya.
