Ginluthang ang duha ka babayi sa Brgy. Ungka 1, Pavia, Iloilo, kagab-i sang alas-7, Abril 14, 2026, sang wala pa makilal-an nga suspek.
Ginkilala ang biktima nga sanday Alyas Divine sang Zone 2, San Juan, Molo, nga amo ang ginbawian gid sang kabuhi kag si Alyas Shane nga residente sang Sta. Barbara, Iloilo, nga padayun naman nga ginabulong sa ospital.
Sa interview sang Bombo Radyo sa isa sa mga nakabati sang lupok nga si Alyas Inday, iya ginpahayag nga posible nga sakay sang motorsiklo ang suspek matapos nila nga nabatian ang pagburhot sang motor sang natapos na ang pagpangluthang.
Suno man sa iya, indi man nila kilala ang duha ka biktima nga nagapanglakaton lang man kun tani suno sa mga nakakita sang insidente.
Nakita-an man ang pito ka basiyo ukon empty shell sang bala sang armas nga gin-gamit sa krimen sa nasambit nga lugar.
Nahibaluan nga gilayon man nga gindala ang duha ka biktima sa ospital agud nga mahatagan sang nagakadapat nga pagbulong, apang ginbawian gid sang kabuhi ang isa sa ila bangud sa igo sini sa dughan.
Sa subong, padayun pa ang imbestigasyon sang mga awtoridad.
